आदरणीय मान्यजन, दाजुभाइ, दिदीबहिनी तथा शुभचिन्तक महानुभावहरू,
जय देवर्षि गौतम परिवार !
देवर्षि गौतम परिवार संस्थाको आधिकारिक वेबसाइटमा यहाँहरूलाई हार्दिक स्वागत गर्न पाउँदा मलाई अत्यन्त खुसी र गौरव लागेको छ।
२०७२ पुषबाट "gautam family -वालकृष्ण वंश" नामक Facebook Page निर्माण तथा संचालन बाट सुरु भएको अभियानले मुर्तरुप लिएर मिति २०७९ चैत्र २६ गते दर्ता भएपछि "देवर्षि गौतम परिवार" संस्थाको आधिकारिक वेबसाइट "www.gautamfamily.org.np" सञ्चालन २०७९ चैत्र २९ मा गरिएको हो ।
हामी एक गौरवशाली परम्परा र महान् ऋषिका सन्तान हौं भन्ने मान्यता रहेकोछ । समयको परिवर्तनसँगै हाम्रा परिवारका सदस्यहरू विश्वको विभिन्न कुना र देशका विभिन्न भागमा छरिएर रहनुभएको छ। हाम्रा पुर्खाको विरासत र संस्कारलाई जोगाउँदै छरिएर रहेका सम्पूर्ण परिवारलाई एकताको सूत्रमा बाँध्नु हाम्रो प्रमुख दायित्व हो। यस अवस्थामा, हामी सबैलाई एउटै सूत्रमा बाँध्न, हाम्रो मौलिक संस्कृति, रीतिरिवाज र वंशजको पहिचानलाई जीवन्त राख्न यो संस्था र प्रविधिको प्रयोग (वेबसाइट) को भूमिका महत्वपूर्ण हुनेछ भन्ने मेरो विश्वास छ।
यस संस्थाको मुख्य ध्येय केवल भेटघाट मात्र नभई, एक-अर्कालाई समस्या पर्दा सहयोग गर्ने, जेहेन्दार पुस्तालाई प्रोत्साहन गर्ने र हाम्रा पुर्खाको ज्ञानलाई आधुनिक समाजसँग जोड्नु हो। हामीले यो वेबसाइटमार्फत डिजिटल वंशावली, संस्थाका गतिविधिहरू र आगामी योजनाहरूलाई पारदर्शी रूपमा प्रस्तुत गर्ने प्रयास गरेका छौं। यसै सन्दर्भमा, संस्थाले आफ्नो उद्देश्य प्राप्ति र सामाजिक उत्तरदायित्व पूरा गर्न केही महत्वपूर्ण पाइलाहरू चालेको जानकारी गराउन चाहन्छु। २०८१ साल साउनमा हाम्रो परिवारका छोरा-बुहारी, छोरी-ज्वाईं तथा भाञ्जा-भाञ्जी का विवरण उल्लेख गरिएको "देवर्षि गौतम पुस्तावली" प्रकाशन गरिएकोछ। हाम्रा सदस्यहरूलाई भैपरी आउने समस्यामा साथ दिन र सामूहिक हितका लागि हामीले 'देवर्षि गौतम कल्याण कोष' को स्थापना गरेका छौं। यसले हाम्रो एकतालाई केवल भावनात्मक मात्र नभई व्यवहारिक रूपमा पनि बलियो बनाउनेछ। साथै, हाम्रो भावी पुस्ताको शैक्षिक भविष्यलाई मध्यनजर गर्दै जेहेन्दार तथा आर्थिक सहयोगको आवश्यकता भएका विद्यार्थीहरूका लागि धनमाया-प्रेमनिधि प्रतिभा छात्रवृत्ति र नन्दकुमारी-चुडामणी छात्रवृत्ति को व्यवस्था समेत गरेका छौं। संस्थाद्वारा आफ्ना कल्याणकारी गतिविधिको परिमार्जनका साथ विस्तार गरिनेछ।
यो वेबसाइटमार्फत हामी हाम्रा गतिविधिहरू, डिजिटल वंशावली र कोषको विवरणलाई पारदर्शी रूपमा यहाँहरू समक्ष पुर्यािउने छौं।
आउनुहोस्, हामी सबै मिलेर आफ्नो वंश, कुल र समाजको उत्थान तथा सेवामा समर्पित होऔं।
अन्तमा, यस संस्थालाई अझ सुदृढ र गतिशील बनाउन संस्थाका यी परोपकारी कार्यहरूमा यहाँहरूको सक्रिय सहभागिता, आर्थिक तथा भौतिक सहयोग र रचनात्मक सुझावको सधैं अपेक्षा गर्दछु ।
धन्यवाद !
..........................
अध्यक्ष, कार्य समिति
देवर्षि गौतम परिवार
मिति :२०८१ भाद्र २५
